सिस्टिमॅटिक विड्रॉवल प्लॅन अर्थात एसडब्ल्यूपी हा म्युच्युअल फंडातील गुंतवणुकीचा आणखी एक पर्याय आहे. ज्या वेळी आपल्याला एकहाती मोठी रक्कम मिळालेली असते आणि त्यानंतर आपल्याला त्यातून नियमित उत्पन्न हवे असते, तेव्हा एसडब्ल्यूपी हा पर्याय वापरता येतो. उदा. रिटायरमेंटच्या वेळी मिळालेली भविष्य निर्वाह निधी, ग्रॅच्युइटी, लीव्ह एनकॅशमेंट यांसारखी एकत्रित रक्कम, अशी रक्कम आपल्याला पुन्हा मिळणार नसते किंवा घर, जमीन, यांसारख्या विक्रीतून आलेली रक्कम हीदेखील आपल्याला पुन्हा पुन्हा मिळणार नसते. अशी रक्कम प्रामुख्याने बँकेत किंवा पोस्टात दरमहा अथवा तिमाही व्याज मिळेल अशा रीतीने गुंतविली जात असल्याचे दिसून येते; मात्र सध्याचे ढासळते व्याजदर पाहता बँकेत अथवा पोस्टात रक्कम गुंतविणे तितकेसे फायदेशीर ठरत नाही. अशा वेळी म्युच्युअल फंडात एसडब्ल्यूपी पद्धतीने केलेली गुंतवणूक निश्चितच फायदेशीर ठरू शकते.

या पद्धतीत म्युच्युअल फंडाच्या आपल्या सोयीच्या योजनेत एकरकमी पैसे गुंतविले जातात व त्यातून दरमहा/तिमाही/सहामाही/वार्षिक अशा कालावधीने आपल्या गरजेनुसार ठराविक रक्कम नियमितपणे आपल्याला दिली जाते. ही रक्कम रोख न मिळता आपल्या बँक खात्यात जमा केली जाते. अशी गुंतवणूक करताना आपण आपल्या जोखीम घेण्याच्या क्षमतेनुसार गुंतवणुकीचा पर्याय निवडू शकतो. आपल्याला शेअर बाजाराची जोखीम घेणे शक्य असेल तर आपण इक्विटी फंडात गुंतवणूक करू शकता. जास्त जोखीम घ्यायची नसेल, तर आपण बॅलन्स्ड फंडात गुंतवणूक करू शकता (यातील शेअर बाजारातील गुंतवणूक सुमारे ६५ टक्के इतकी असू शकते). शेअर बाजारातील जोखीम घ्यायची नसेल, तर डेट फंडातही गुंतवणूक करता येते; मात्र मिळणारा परतावा ‘इक्विटी’मध्ये सुमारे १४ ते १५ टक्के इतका, तर बॅलन्स्ड फंडामध्ये सुमारे ११ ते १२ टक्के व ‘डेट’मध्ये सुमारे नऊ  ते १० टक्के इतका मिळू शकतो. अर्थात अशी खात्री देता येत नाही.

इक्विटी व बॅलन्स्ड फंडातील एका वर्षानंतर काढलेल्या रकमेवर दीर्घकालीन भांडवली नफा कर (लाँग टर्म कॅपिटल गेन टॅक्स) लागू होत नसल्याने यातील आपणास हवी असणारी नियमित रक्कम, (दरमहा/तिमाही/सहामाही/वार्षिक) गुंतवणुकीनंतर एका वर्षानंतर घेणे जास्त फायदेशीर ठरू शकते. आपण ३० लाख रुपये इतकी रक्कम गुंतविली आणि नऊ टक्के दराने मिळणाऱ्या रकमेइतकी रक्कम दरमहा घेतली (पेन्शनप्रमाणे) तर पाच वर्षांनंतर आपली गुंतवणूक अशी असेल -  

इक्विटी - अपेक्षित परतावा १५ टक्के  :

३० लाख रुपयांवर नऊ टक्के दराने वर्षाला दोन लाख ७० हजार रुपये व्याज मिळेल. ते दरमहा स्वरूपात घेतल्यास एका वर्षानंतर दोन लाख ७० हजार भागिले १२ म्हणजेच २२ हजार ५०० रुपये मिळतील. त्यानंतर सहा वर्षांनंतर सुमारे ५० लाख परत मिळतील. 

बॅलन्स्ड फंड - अपेक्षित परतावा १२ टक्के :

तीस लाख भागिले नऊ म्हणजे दोन लाख ७० हजार रुपये नियमित रक्कम एका वर्षानंतर दोन लाख ७० हजार भागिले १२ म्हणजे दरमहा २२ हजार ५०० रुपये घेतल्यास सहा वर्षांनंतर सुमारे ४० लाख परत मिळतील.

डेट फंड - अपेक्षित परतावा १० टक्के :

तीस लाख भागिले नऊ म्हणजे दोन लाख ७० हजार रुपये नियमित रक्कम एका वर्षानंतर दोन लाख ७० हजार भागिले १२ म्हणजे दरमहा २२ हजार ५०० रुपये घेतल्यास सहा वर्षांनंतर सुमारे ३५ लाख परत मिळतील.

याउलट बँक अथवा पोस्टात हीच रक्कम म्हणजे ३० लाख रुपये गुंतविले, तर सध्याच्या व्याजदरानुसार जेमतेम १७ हजार ५०० रुपयेच दरमहा मिळू शकतील आणि पाच वर्षांनंतर मिळणारी रक्कम जेवढी गुंतविली होती तेवढीच असेल.

यावरून लक्षात येईल, की एकरकमी मोठ्या गुंतवणुकीतून आपल्याला काही रक्कम नियमित हवी असेल, तर म्युच्युअल फंडाची एसडब्ल्यूपी ही गुंतवणूक योजना बँक अथवा पोस्टातील गुंतवणुकीपेक्षा नक्कीच किफायतशीर आहे. त्यासाठी आपली जोखीम घेण्याची क्षमता विचारात घेऊन योग्य तो पर्याय निवडणे आवश्यक आहे.

(लेखक पुण्यातील सर्टिफाइड फायनान्शियल प्लॅनर आहेत.)